ار يو فينز اوووول داي !!!
Are you Fines all Day.....
خطفتنى الجمله وانا بشترى حاجه امبارح باليل من عند الكشك ... فبصيت على صاحب الكلمات الرائعه دي وبيقولها لمين ؟؟؟
بصيت لقيت كاركتر مصري لطيف راجل قصير القامه مهذب الشنب ويرتدي عوينات "نضاره بالبنانى يعنى منا بتكلم فى اللغات بقى"
وتقريبا فى اول العقد الخامس من عمره رافع وسط البنطلون لحد زوره عشان يستخدم كل فتحات الحزام ...
وبيطرب " الحقيقه انه بيتمنظر بالكلمات الجامده دي على عم صابر الغلبان بتاع الكشك" :|
كنت هموت واشتمه على اللغه الزفت الى بتكلم بيها دي خصوصا ان وش عم صابر بقى تكنى كالر "لغات لغات يعنى "
بس فى سري قلت يا بت وانت مالك ؟؟؟
هوه بشكل اوبأخر خد باله انى راميه ودن وانا بجيب بقيت الحاجات واقفه مستنيه عم صابر اما يخلص حصه الانجليزى عشان احاسبه واتجه على بيتى ، فا ابن الايه تخيل انى مبهوره بيه فساق فيها وياريته مساق لانه خيش فى كل اللغه الى درستها فى حياتى الى انا اصلا ملصماها بأعجوبه :)))
فلقيته بيقول لعم صابر بأبداع مميز ...
يو ار اسبيك دانمركش ؟؟؟
you
are speak Demarkish?
وعم صابر وشه ازرق مع دي بقى لانه حسها شتيمه تقريبا من رد فعلى ووشى الى تحول لعلامات استفاهم صغننه صغننه ؟؟؟؟
فسئله بعصبيه يعنى ايه الكلام ده ؟؟
فالمستر بطلاقة المترجم الفورى "القاموس الناطق يا خواتى "
جاوبه : هل تتحدث الدنماركيه !!
انا كنت خدت بقيت فلوسي وحاجتى وقلت اروح بيتنا قبل مرجع لى أمي بتكلم بلغت الاشاره بعد هذا الكم من التلوث اللغوي ...
كان هوه كمان مستر لانجودج ماشي ...
وشفته وهوه داخل عماره قبلينا بكام عماره كدا مرات البواب الى فيها وبنوته الصغيره صحابي ...
فرحت رميت عليها السلام وقلتلها بقولك ايه يا ام رانيا ؟؟؟
قالتى اوومري يا ابله اسماء :)))
قلتلها هوه الراجل ده مين ؟؟؟
قالتلى ده الاستاذ شفيق مدرس الانجليزي !!! الى ساكن فى الدور الخامس ....
انا بمرارره شديده قلتلها ممممممم انجليزي ؟؟؟
قالتلى : لو بتسئلى عليه عشان يدي درس للانسه سارة فهوه مدرس شاطر اوى بيدى لحد ثانويه عامه وطول الليل والنهار بيدى دروس ؟؟؟
*"ساره دى اختى الصغيره الى طالعه اعدادية "
قلتلها بفزع لآ ساره مبتأخدش انجليزي فى المدرسه دى بتأخد دنماركي ....
طول خطواتى من ادام عمارة مدرس الانجليزى ...
بفتكر فيلم عسل اسود وبقول والله احسنت يا حلمي ...
ودخلت بيتنا صليت العشا ودعيت قلت "يارب يارب الطف بينا وبالاجيال الى بعدينا وسوى معاش كل المدرسين والمدرسات الى من عينه مستر شفيق :(((((
